Ашикова Мерьем Миллий той – Ватанда

   

  Миллий той – Ватанда

Ашикова Мерьем (Красногвардейск районы  Октябрьское къасабасы   И.Гаспринский адында  I – III басамакълы    3 – умумтасиль мектебининъ   5 – сыныф талебеси)

                                

Бир кунь, мен эски фоторесимлерни бакъкъанда, Рустем къартбабамнынъ  ве Зекие къартанамнынъ, той фотосуретлерини корьдим. Бу гузель той акъкъында сизге икяе этмеге истейим.

1968 сенеси. Эки къырымтатар къорантасы сюргюнликтен сонъ Некрасово коюне (Къурман районы) тюштилер. Бекиров Лютфи, Уста Иззет аилеси иле озюнинъ Ватанына - Къырымгъа къайттылар. Оларнынъ балалары Рустем ве Зекие фааль ватанперверлер олдылар. Cюргюнликтен сонъ, Къырымда биринджи никях тойларындан бири, къартбабамнынъ ве къартанамнынъ тою олды. Олар, ватанперверлер олып, къырымтатар услюбинде тойны  кечирмеге истедилер.

Тойдан бир кунъ эвель, Зекие къызларнен берабер, келиннинъ эвинде хна геджеси кечирдилер. Къызлар халкъ йырлары ве оюнларынен шенъленип, татлы емеклерни ашап, келинге чешит – чешит ресимлер безеттилер. Рустем исе озь достларынен тыраш мерасимини кечирдилер.

Келиннинъ антери узун, беяз, парча басмадан тикильген эди. Башында исе къырмызы къадифеден тикильген, чешит капиклернен ве кумюштен  япылгъан уфачыкъ япрачыкъларнен яраштырылгъан фес. Фес  тёпелиги  чешит чечек ве гуль шекиллеринен нагъышлангъан. Феске марама туттырылгъан эди. Марамалы фес къызларнынъ незакетли, намуслы олгъаныны ифаде эте. 

Келиннинъ антерини дюльбер къушакъ яраштыра эди. Къушакъ къартанамнынъ аилесине Эмине къартбитамдан  кечти. Къушакъ къыйметли мирас олды. Йипишли къушакъ   кумюш сулюклеринден япылгъан эди. Феснинъ чечек орьнеги къушакъ орьнегинен бир шекильде  беджерильген. Къушакънынъ къоланы чечеклернен ве япракъларнен безетильген. Шимди исе  бу феснен къушакъ Ускют коюнинъ (с. Приветное) мектеп музейинде булуна.

Киев урбасы къара тюсте эди. Боюнда ёлакълы боюнбагъ, башында исе онынъ бабасы багъышлагъан къаверенкли къалпакъ.

Бир койде, бир сокъакъта эки кунь девамында эки той.Эр бир тарафта дёрт юзге къадар мусафирлер бар эди. Тойны Бадин Аединовнынъ такъымы алып баргъан. Чалгъыджылар озь усталыгъынен эр кесни айретте къалдыргъанлар. Мусафирлернинъ чокъусы мемлекетнинъ чешит ерлерине сюргюн олунгъан кошелеринден кельгенлер.

Бойле мерасимлер халкъны бирлештирип, тезден Ватангъа къайтмакъ умютини бере эдилер.